::: bu gün mənim Allah’ım ol :::

bu gün mənim Allah’ım ol, qorxum səndən
sevim səni, hər dəfə baş əyim sənə
hər yanımda görüm səni, doyum səndən
“cənnətinə göndər məni” deyim sənə
qoru məni insanlardan, yalanlardan
səni hiss edim ürəyimdə, hər axşam
dua edim sənə mənim olmağınçün
mənə göstər sənli olan uzun bir yol
bu gün mənim Allah’ım ol

sənə uçum, buludların arasından toxun mənə
gözlərində itir məni, bitir məni bu dünyadan
qoxun mənə hopsun, dünya
qoxuyla yox olsun daha
uzansın göydən mənə qol
bu gün mənim Allah’ım ol

yağış yağsın səndən mənə
qanad ver uçum səmaya, qonaq gəlim bu gün sənə
süz iki çay
şəkilləri hazırla birlikdə baxaq
səvab kimi günahım ol, sabah mənim sabahım ol
bu gün mənim Allah’ım ol..

::: ilk mən getmək istədim.. :::

ilk mən getmək istədim,
xəyalların dalınca,
ki sən getdin birinci, mən də sənin arxanca,
yoxa çıxdın bir anlıq dalğalarda, günəşdə,
axtarırdım səni əlimə düşən yağışda,
məni bağışda,
tapa bilmədim səni nə qədər axtardımsa,
sən gəldin xəyalıma, əlin, mavi əlbisə,

ilk mən getmək istədim buralardan qaçaraq,
sən kəsdin qabağımı,
yanımdaca ağladın,
şamlar söndü, dalğalar gözdən itdi səssizcə,
yalnız, tənha indicə,
ilk mən getmək istədim,

əritdim qürurumu, qatdım sənin içkinə,
son kəs ağladıq ikimiz birlikdə,
ayrılıq çətin deyildir, çətin sənin gülüşündür,
ağlayırdın sən çox asan gözlərimdə, əllərimdə,
ilk mən getmək istədim,
lakin dayandım,
“xanımlar öndən” dedim, keçdin məndən qabağa,
ilk sən getdin sevgilim,
ikimizdən uzağa…

::: mən səni düşünərkən :::

mən səni düşünərkən
əllərində başqa əl, gözlərində başqa göz
dodağında başqa iz
ürəyin başqa tərəfdə
mən səni düşünərkən
yarpaqlar düşdü budaqlardan
göyqurşağı rənglərindən azad oldu
çiçəklər də soldu
ləçəklər yetim qaldı

mən səni düşünərkən
yarım qalan şeiri tamamladım
sənsə məktub oxuduğunda
mən səssiz ağladım
hiss etdim

mən səni düşünərkən
yağış mənə gəldi
darıxdığını söylədi üzərimizə yağmaq üçün
kədərlə güldü
döndü getdi
mən də getdim

mən səni düşünərkən
dünyaya gəldim
və səni düşünərkən
öldüm..

::: sevirəm söylə.. :::

Halil Sezai’ynən başdamağ isdədim biraz fərqlilik kimi olsun

******************************************

Bəlkə qayıdaq biz ötən günlərə?
Sən mənə sevirəm söylə, mən sənə
Gedək bizsiz keçən, itən günlərə
Sən mənə sevirəm söylə, mən sənə.

Səninçün yazılır şeirlər, bəstə
Məndən səni sevən qəlbimi istə
Uzanaq bəmbəyaz buludlar üstə
Sən mənə sevirəm söylə, mən sənə.

Sənsizliklə çəkmişəm böyük sınaq
Səni gördüm, sevindim ağlayaraq
Gözlərimə baxıb qucaqlayaraq
Sən mənə sevirəm söylə, mən sənə.

Mələklərin göz yaşları qurudu
Tanrı bizim sevgimizi qorudu
Çiçəklər birlikdə nəğmə oxudu
“Sən mənə sevirəm söylə, mən sənə”.

Zaman bizə öz oynunu oynadı
Sevgi ucsuz-bucaqsız bir dəryadı
Dünya seviləsi gözəl dünyadı
Sən mənə sevirəm söylə, mən sənə.

Sənsiz keçirmişəm mən bir neçə il
Neçə isti, neçə şaxtalı fəsil
Sən bir səhər məzarımın üstə gəl
Sən mənə sevirəm söylə, mən sənə…

P.S: yayda yazdığım bir şeir.. və sonda da Halil Sezai oxusun istədim.

::: nə sevgi var, nə də sən.. :::

Qəlbindəki sevgini yağış yuyub apardı
Sevərkən məni səndən, səni məndən qopardı
Biz sənlə gizlənərdik, sevgi bizi tapardı
İndi axtarıram mən, nə sevgi var, nə də sən…

Ne tez payız gəldi ki, heç yaya doymamışkən
Əhvalım hava kimi, hər an olub dəyişkən
Nə tez ayrıldın məndən, sevgimdən doymamış sən
İndi axtarıram mən, nə sevgi var, nə də sən…

Ağladınmı gecələr, hər kəsdən gizdi-gizdi
Sanırdım xoşbəxt idik, ikimiz-sizdi-bizdi
Ürəyimdə yaralar səndən qalan tək izdi
İndi axtarıram mən, nə sevgi var, nə də sən…

Qəlbimin sevincini, əsdi, dağıtdı külək
Sevgini daşıyırdı, ağlayırdı kəpənək
Mən səninçün qəhrəman, sən mənimçün bir mələk
İndi axtarıram mən, nə sevgi var, nə də sən…

Duyğularımdan sənə hədiyyə bağlamışdım
Verdiyin məhəbbəti qəlbimdə saxlamışdım
Sen gedərkən bilirsən nə qədər ağlamışdım?
İndi axtarıram mən, nə sevgi var, nə də sən…

İndi tək oturmuşam, düşünürəm tək səni
İtirmək çox çətindi dəhşət sevərək səni
Bilmirəm mən bilmirəm, unutmur ürək səni
İndi axtarıram mən, nə sevgi var, nə də sən…

Daha yazmayacağam, söz verirəm özümə
Üsyan edirlər daha göz yaşlarım gözümə
Xoşbəxtsənsə nə yaxşı, fikir vermə sözümə
İndi axtarmaram mən, nə sevgini, nə səni…..

::: bacardım :::

soyuq şaxtalı bir gecə mən yatağımda
artıq mesajsız qalan telefonum qucağımda
gözüm saatın asta-asta tərpənən əqrəbində
üzümdə saqqal, tük, saçım da it günündə
mənimçün sıradan bir gün, yatıb oyanacam
yenidən növbəti bir gün kamputerin qabağında dayanacam
yenə facebook profilim, yenə twitter, yenə bloq
yenə tualet, yenə hamam, yenə dükan əlimdə klok
daha düşünmürəm sabahın necə olacağını
hansı xatirələrlə yaddaşımda qalacağını
məni düşündürür ancaq və ancaq səhərin açılması
şaxtalı bir gündə günəşin bulud arasınnan saçılması
sənsizlik məni narahat edirdi əvvəlkindən az
kədər artıq məndə qalıb bir az-səninkindən az
yuxuya getdim həmin an, ayaqlarım üşüyərək
oyatdılar məni ayıl, oyanmaq vaxtıdı deyərək
ayılsam da fikrim qalmışdı mənim yuxumda
unutmuşdum, sənsizliyi atmışdım öz yuxumda
bacarmışdım yuxuda səni bir an silib atmağı
bacarmışdım yuxuda səni birdəfəlik unutmağı
yada salmamağı bacarmışdım sevincdən uçurdum
sevincdən “ayrılıq” yazılan buludlarda qaçırdım
bacarmışdım telefondakı mesajları oxuyub kədərlənmirdim
ötən günləri xatirələri yada salıb qəhərlənmirdim
məni incitmirdi daha yada düşən sənli günlərim
məni maraqlandırırdı gələcəyim, maraqlandırmırdı dünlərim
mən bacarmışdım hara baxırdımsa səni görmürdüm
mən bacarmışdım sənsizlikdən depresiyaya girmirdim

sənsizliyin daşını atmışam, hobbim olub gözəl həyat
qulağımda qulaqcığım əllərimdə fırlanan kainat

daha yadıma düşmür sənlə gizli görüşdüyümüz anlar
daha yadıma gəlmir sənlə gizli öpüşdüyümüz anlar
daha gəlmir mənə mesaj, daha gəlmir ayrılıq zəngləri
indi gəlir səhifə reklamları, “like” edilən şəkil linkləri
məni incitmir səninlə yaşadığım mənalı xoşbəxtlik
həyatim olub tam başqa, nə romantika, nə giclik
özümçün yaşıyıram yavaş-yavaş, özümçün yaşıyıram
vurduğun yaraların üstünü “ah” çəkmədən qaşıyıram
daha xoşbəxtem hər şey yolundadı firəvanlıq içindəyəm
bir gün “Google Earth”də Dubaydayam, bir gün Çindəyəm
özümçün fırlanıram o başa bu başa yorulmadan
birindən ayrılıram yeni sevginin təməli qurulmadan
yuxum gerçək olmuşdu unutmuşdum onu yuxudan ayılanda
belə xoşbəxtçilik yaşamamışdım heç vaxt həmin anda
indi yaydı oturmuşam evdə sərin içirəm “İcetea”
gecədi yatmaq vaxtıdı get yat Ezi…

::: peşmansan? :::

peşmansanmı?

üzümə bax doğru söylə

peşmansanmı?

keçmişini nağıl eylə

danış mənə olanları

gerçəkləri, yalanları

səni yada salanları

yadına sal

səni silənləri yandır

səni əzmək istəyənləri dayandır

məni atdın, səni atdı

məni satdın, səni satdı

ikimiz də söləyirik

bu həyatdı?

xəyanət etdin mənə sən

xəyanət eylədi sənə

dərd qoydun getdin mənə sən

ayrılaq söylədi sənə

peşmansanmı?

mənə etdiklərin gəldi öz başına

kədərlərin sarılıbdır göz yaşına

yaddaşına saldı yara

indi gedəcəksən hara?

əlbəttə qəbrim üstünə

ruhum sənlə edir söhbət

ruhum da sənlə yaşamaq istəyir sonsuz məhəbbət

mən ölmüşəm sənsizliklə

səni gözləyirəm hər gün məzarımda

səhər-axşam, gecə-gundüz

səbirsizliklə…

P.S: Və sonda sizi mahnıyla baş-başa buraxıram..

::: baxma! :::

Ürəyinin səsini sən dinləmə,

İstəmirəm mənə heç nə eyləmə,

Mənə bir daha “sevirəm”  söyləmə,

Gedirəm arxamca dönüb baxma, yar!

*********************************

Sevdiyini sanmışam, aldanmışam,

Yaşadığım günlərçün utanmışam,

Sevgi ünvanında tək dayanmışam,

Gedirəm arxamca dönüb baxma, yar!

*********************************

Ürəyim sənin qəlbində yaşadı,

Deyirdilər ürəyiniz qoşadı,

Bax ürəyin ürəyimi boşadı,

Gedirəm arxamca dönüb baxma, yar!

*********************************

Etdiklərin qəbahətdi deyirəm,

Daha bəsdi, kifayətdi deyirəm,

Xəyanətdi, xəyanətdi deyirəm,

Gedirəm arxamca dönüb baxma, yar!

*********************************

Qəlbim alovlanıb yanır, alışır,

Göz yaşlarım al qanlara qarışır,

Ürək səni unutmağa çalışır,

Gedirəm arxamca dönüb baxma, yar!

*********************************

Məni sən sevmişdin təkcə, dünya yox,

Dərdliyəm dərdimə şəfa-dəva yox,

Bircə kərə sevirəm, bir daha yox,

Gedirəm arxamca dönüb baxma, yar!

*********************************

Kədər ürəyimi ovcuna aldı,

Yaşadığım sanki dərin xəyaldı,

İşıqlı günlərım birdən qaraldı,

Gedirəm arxamca dönüb baxma, yar!

*********************************

Göy üzü qara buluda büründü,

Qəlbim sənin arxanca hey süründü,

Mənə də ayrılıq yolu göründü,

Gedirəm arxamca dönüb baxma, yar!

*********************************

P.S: Bu şeiri 2010-cu ilin əvvəllərində yazmışam.

qulaq asmanız məsləhətdi…