::: Bakı’nı tərk edən quşlar :::

səndən xəbər gətirdilər

bir də tənha bir insandan

ağlamısan söylədilər, dedim yalan

inanmadım, boz küçələr addımlarsızmı qalıbdır?

dözməmişdi onlar belə bu gecəyə

Bakını tərk edən quşlar

*

qanadı qırıq, baxışı qartal baxışından iti

sanki görmək istəyirdi təbiəti

sanki bezmişdi damlardan, heykəllərdən

zibil dolu sahillərdən

Bakını tərk edən quşlar

*

dönmək belə istəmirdi

nə keçmişə, nə insana

görmək istəmirdi heç bir insan üzü

təkcə xatırladı bizi

qanad çaldı, mavi səmayla qovuşdu

Bakını tərk edən quşlar

*

bu gün fərqli bir gün idi

Bakı küləksiz

və təmiz

tək, tənha qalmışdı Bakı

küləklə xəyanət etmişdi Bakıya

Bakını tərk edən quşlar..

::: son ümidlər :::

fikirləşdim ki bir az günah qazanmalıyam
səni görmək üçün, sənə qovuşmaq üçün
daha çox yalan danışmalıyam bəlkə də
səninlə gülmək üçün cəhənnəmin ocağında
hər tərəf bağlı mənə, tək sən idin yaxın, isti
gecələr ulduzsuz, aysız qarşılayıram səhəri
düzdü
yenə də səhv məndə ola bilər səni itirdiyim üçün
düzdü
səni buraxmamalı idim, peşmanam
səni qapıdan ötürdüyüm üçün
bitirdiyim üçün sevgimizi, hər kəs qaçdı məndən
yalan, bu da yalan, sevindi hər kəs
uçdu məndən qəlbimə qonan ağ kəpənəklər
onlar sənə gəldi, mən özümə gəldim

tut əllərimi, xilas edək dunyanı ikimiz
sən sevgi tanrısı ol, mən ədalət tanrısı..

::: mən səni düşünərkən :::

mən səni düşünərkən
əllərində başqa əl, gözlərində başqa göz
dodağında başqa iz
ürəyin başqa tərəfdə
mən səni düşünərkən
yarpaqlar düşdü budaqlardan
göyqurşağı rənglərindən azad oldu
çiçəklər də soldu
ləçəklər yetim qaldı

mən səni düşünərkən
yarım qalan şeiri tamamladım
sənsə məktub oxuduğunda
mən səssiz ağladım
hiss etdim

mən səni düşünərkən
yağış mənə gəldi
darıxdığını söylədi üzərimizə yağmaq üçün
kədərlə güldü
döndü getdi
mən də getdim

mən səni düşünərkən
dünyaya gəldim
və səni düşünərkən
öldüm..

::: getdin gecə :::

“biz”i xatırlamaq çətin, “sən”i xatırlamaq asan
sənin xəyanətin doğru, sənin məhəbbətin yalan
sevərik bir-birimizi, belə edirdim mən güman
sən tərk edib getdin gecə, qaldım kölgənlə baş-başa..

xəyalımda axtarırdım, səni, sənli günləri mən
yuxularda qaytarırdım səni, sənli günləri mən
hər an yadda saxlayırdım səni, sənli günləri mən
sən tərk edib getdin gecə, qaldım kölgənlə baş-başa..

ağlımdan getməz heç zaman, saçların, gözəl gözlərin
qəlbimdə qalır hələ də, silinməyəcək izlərin
kitab oldu, əsər oldu, söylədiyin hər sözlərin
sən tərk edib getdin gecə, qaldım kölgənlə baş-başa..
sən tərk edib getdin gecə, qaldım kölgənlə baş-başa…..

::: peşmansan? :::

peşmansanmı?

üzümə bax doğru söylə

peşmansanmı?

keçmişini nağıl eylə

danış mənə olanları

gerçəkləri, yalanları

səni yada salanları

yadına sal

səni silənləri yandır

səni əzmək istəyənləri dayandır

məni atdın, səni atdı

məni satdın, səni satdı

ikimiz də söləyirik

bu həyatdı?

xəyanət etdin mənə sən

xəyanət eylədi sənə

dərd qoydun getdin mənə sən

ayrılaq söylədi sənə

peşmansanmı?

mənə etdiklərin gəldi öz başına

kədərlərin sarılıbdır göz yaşına

yaddaşına saldı yara

indi gedəcəksən hara?

əlbəttə qəbrim üstünə

ruhum sənlə edir söhbət

ruhum da sənlə yaşamaq istəyir sonsuz məhəbbət

mən ölmüşəm sənsizliklə

səni gözləyirəm hər gün məzarımda

səhər-axşam, gecə-gundüz

səbirsizliklə…

P.S: Və sonda sizi mahnıyla baş-başa buraxıram..

::: nəhayət :::

günahsız sevgi istəyirəm yenə
nə yalan olsun, nə də bir xəyanət
uzadıram əlim çatmayır sənə
məndən niyə üz döndərib məhəbbət?..

damcı-damcı yağan yağısh könlümə
dərman kimi yayılır aram-aram
qır zəncirləri gəl qovuş könlümə
mən səni yad əllərdən qoruyaram

bizə düşmən kəsilib baxan gözlər
nifrət dolu baxışları görürəm
mənim qəlbim sənin qəlbini gözlər
qəlbindəki naxışları görürəm

üz döndərdi kədər bizdən, nəhayət
xoşbəxtik, xoşbəxtik biz bu həyatda
sevinc yaşı axır gözdən, nəhayət
daha nə istəyim bu kainatda?…

::: şeir yazmaq istəyirəm :::

şeir yazmaq istəyirəm, mən püskürən vulkanlardan

 

biraz uzaq gəzməliyəm çox öskürən insanlardan

 

şeir yazmaq istəyirəm aldadılmış duyğulardan

 

şeir yazmaq istəyirəm cavabsız qalan sorğulardan

 

daha neçə-neçə mövzulardan yazmaq istəyirəm

 

məndən zəif olanlara bir neçə kəs uduzmaq istəyirəm

 

bezmişəm qalib olmaqdan nə qədər qalibiyyət?

 

10 barmağımın hərəsində bir başqa cür qabiliyyət

 

şeir yazmaq istəyirəm mövzusu olsun “i love you”

 

mənə please salfetka ver, amma ki olsun quru

 

batıbdı şeir yazdığım vərəqin sol tərəfi

 

kiminçün satılır evi, maşını, işi, şərəfi

 

şeir yazmaq istəyirəm üzdə patriot olanlardan

 

şeir yazmaq istəyirəm ağac kimi görsənib ot olanlardan

 

şeir yazmaq istəyirəm, amma bilmirəm nədən yazım

 

bəlkə yasdan, mərsiyyədən, həm də cənazədən yazım

 

şeir yazmaq istəyirəm sevgidən, eşqdən, məhəbbətdən

 

şeir yazmaq istəyirəm yalandan, aldatmaqdan, xəyanətdən

 

nifrətden yazmaq istəyirəm, insanların maskalı üzlərindən

 

doğrunu gizlətməkçün eynək taxan, linzalı gözlərindən

 

daha bəsdir, kifayətdir bu qədər misralar yetər

 

mənim növbəti sətirlərim gözlərinizdən itər..

 

 

qulaq asın…

 

::: vəfasız :::

 

 

 

 

 

söz vermişdin səvəcəkdin,

hanı sözün?

bitti hər şey,

sona çatdı,

öz-özümə deyirəm bu nə həyatdı?

batdı mənim qəlbim sevgi dəryasında,

dünyasında yoxam artıq,

zəhər qarışıbdır artıq göz yaşıma,

ad yazmayın baş daşıma,

yaddaşıma qəbir qazın,

ölüb daha,

kəfən geyib bəyaz, bəyaz,

sevgi dəryam dayaz, dayaz,

yaz gəlsə də qışdayam mən,

hər tərəfə günəş doğub,

amma ki yagışdayam mən,

damcıları düşür yanan ürəyimə,

amma söndürə bilməyir,

qanım donub damarımda,

qar görürəm baharımda,

xəzansız keçdi payızım,

zamansız oldu ayrılıq,

taqət tükəndi, bədənim alıb yara,

hər tərəfim olub qara,

yaşamağım çox mənasız,

AY VƏFASIZ,

hara getdin?

süqut eylədi məhəbbət,

göz yumdu ədalətsizliyə,

hələ də mən sənsizliyə

dözməliyəm?

əzməliyəm xəyanəti,

mən görmək istərəm gözündəki  məni,

görəsən hiss etdin özündəki məni?

sevəcəkdik biz yalansız,

AY VƏFASIZ,

xoşbəxt ol…

 

 

::: yalan :::

 

 

 

 

 

mənə yalan söyləyiblər, bilirəm,

sevməmisən sən heç məni, anladım,

güzgünün qarşısına mən keçərək ,

dayanmadan hey özümü danladım.

 

necə aldanmışam sənin sözünə?..

özümdən də çox sənə inanırdım,

özümün sevgisindən də hətta çox,

sənin məni sevdiyini sanırdım.

 

sənin məni aldatdığından sonra,

heç özümə də inana bilmirəm,

o qədər əzab çəkirəm ki indi,

bu əzablara dayana bilmirəm.

 

niyə axı mənə yalan söylədin?

yandırdın sevgi şamımı  işıqda,

səni dəli kimi sevən ürəyim ,

indi olub darmadağın, qırıq da.

 

geri dönəcəyinə ümid yoxdu,

yuxularda belə mənə dönmürsən,

sənə “mələyim” deyərdim hər dəfə,

amma mələktək göylərdən enmirsən.

 

sənsizliyin xəyalını qururam,

qaranlıq otaq və çürümüş ürək,

toxuna bilməcəyəm sənə mən,

sənsizliyə də öyrəşim mən gərək.